Maab The Vitual Artist

يسر دوحة ستايل أن تقدم الفنانة مااب تاج، الفنانة من السودان التي تم اختيارها من مشروع الوكالة الفرنسية للتنمية في إفريقيا
احتفالًا بالذكرى الثمانين عامًا من تأسيسها، دعت فنانًا واحدًا من كل دولة أفريقية لتقديم أعمال تعكس تخيلهم لأحلامهم وآمالهم في العالم المثالي في عام 2101

ما اسمك؟
اسمي مااب تاج الدين
اين ومتى ولدت؟
اتولدت في السعودية بتاريخ ٢٨/٥/١٩٩٦
أين ذهبت إلى المدرسة؟
درست الأساس والثانوي في مدارس القبس
ما أكثر شيء أعجبك في المدرسة؟
في المدرسة كنت بحب حصص الفنون والموسيقي والفسحة برضو
من كان الشخص الأكثر نفوذاً بالنسبة لك عندما كنت طفلة؟
اكتر ناس اثرو في طفولتي وتشكيل شخصيتي الحالية هم امي وابوي


ماذا كانت وظيفتك الأولى ؟
اول وظيفة لي كنت في سنة أولي عملت لي بزنس صغير كنت برسم في التشيرتات بألوان قماش وببيعيها، وكل مرة كنت بطور نفسي من خلالو وبحاول رسوماتي تكون واقعية وجذابة اكتر وواصلت فيهو لحدي سنة رابعة جامعة.
كلمينا عن علاقتك بالفن / الرسم
رحلتي في الفن ابتدأت من أنا طفلة ف الروضة اعتقد
مش بقولو ف الافلام she learned how to sing before she could even talk؟
بس دي انا كنت برسم وبلون من الروضة ولمن وصلت رابعة اساس شاركت في اول معرض انا ومعاي ٤ زملاء اختارتهم المدرسة عشان كنا موهوبين ف الرسم واقامت لينا معرض شاركت فيهو بلوحة لو ما خانتني الذاكرة كانت حوض سمك وملان سمك ملون. واعشاب ومكونات الحياة البحرية. بديت فيهو بطريقة احترافية سنة ٢٠١٥ وساعدني مجالي المعمار الهندسي لاني أخلق تقنيات جديدة للرسم باني شلت كل البتعلمو في الجامعة وبطبقو في فني. ومن وقتها ما وقفت. الان انا مصممة ثياب سودانية، برسم على الثياب بخلق فن معاصر بملامح سودانية. التحدي البواجهو كل فنان مهما كان نوع الفن البمارسو هو انو كيف يطور نفسو وكيف يكون مميز ويخلي عندو ستايل
ما هي التحديات التي واجهتيها كامرأة في مجال الفن؟
التحديات كامرأة فنانة بتتشكل في الضغوط المجتمعية والاسرية البنواجهها كنساء، تضييق حرياتنا، اقصائنا من الفضائات الخارجية، من التحديات برضو تضييق تحركاتنا تضييق شديد بصورة بتصعب علينا العمل في نفس الوقت وجود ضائقة اقتصادية بتصعب علينا شراء المواد اللازمة للشغل وكذلك الشارع العام، في اوقات كتيرة كنت بعمل جداريات بكون طالعة ونازلة من السلم، والنوع دة من الفن اصلا جديد على الشعب السوداني فكان بالنسبة ليهم منظر غريب وكنت بتعرض لتحرش لفظي ومضايقات.

كلمينا عن مجموعة “الفن كوسيلة للمقاومة
هي مجموعة من اللوحات التي رسمتها بعد الانقلاب العسكري في السودان أثناء انقطاع الإنترنت.
لقد رسمت اللوحات دي لأنها كانت الطريقة الوحيد للتعبير عن مقاومتي، بما انه شعرت أني ما عندي صوت: كنت محبوسة في المنزل بدون إنترنت ولا اتصال بالناس.
كانت هذه اللوحات نوري في الظلام ومصدر الأمل. سأستمر في صنع المزيد من اللوحات، لأقف ضد الظلم والخوف والعجز.

من كان الأكثر تأثيرًا في رحلتك الفنية؟
اكتر زول مؤثر في رحلتي الفنية هو استاذ عفيفي، استاذ عفيفي واحد من الفنانين الكبار والقدام، المناضلين والمكافحين عشان ينشرو فنهم حتى بالرغم من كان وجود النظام السابق الكان بقتحم معارضه يخربها ليهو، مصدر الهام كبير لي، واستاذ عظيم جدا
ما هي أهم الأشياء للتقدم كفنان أو؟ يمكن أن تكون هذه الخصائص والقيم والمهارات، وما إلى ذلك
اكتر حاجة مهمة في تطورنا كفنانين هو التغذية البصرية والممارسة المستمرة، الحاجة دي بتساعد شديد
كيف تمكنت من الموازنة بين متطلبات الفن ودراساتك الجامعية؟
قدرت اوفق بين الدراسة وشغلي في الرسم بي اني بقيت مركزة علي الحاجتين ديل بس في حياتي، الرسم و القراية بس، كنت شاغلة نفسي الوقت كله بالقراية و بالرسم و الشغل

ما هي أفضل لوحة لك حتى الآن؟
حب رسماتي كلهم وكلهم مفضلات بالنسبة لي وقريبات من قلبي، لكن في وحدة عندها رمزية مهمة بالنسبة لي، هي اول جدارية اشتغلتها في القيادة
كانت اول مرة اشتغل جدارية والوقت داك النظام لسا ما سقط كنت خايفة ومتوترة من الخطوة دي لكن قويت قلبي، في القيادة للاقيت استاذ عفيفي لاول مرة كنت طرحت عليهو فكرة جداريتي وطوالي اداني الالوان وقالي اشتغلي… الجدارية كانت بتمثلني وبتمثل ثورتي ونسويتي
رغم انها اتمسحت بعد فض الاعتصام لكن هي لسا جوة قلبي
عنوانها “صوت المرأة ثورة”
مع من تحبي أن تتعاوني أكثر؟
نفسي اشتغل مع فنانين كتار شديد، نفسي اعمل معرض مع الفنان الاستاذ عبد المجيد عفيفي
أي نوع من الفنانين تصنف نفسك؟
visual artisit أصنف نفسي
ما هي الرسالة التي تحبي توجيهها إلى معجبيك؟
بقول ليكم ما تخافو وما تتردو واشتغلو على الحاجات البتحبوها وما تستسلمو ابدا

كيف تشعر أن الإنترنت قد أثر على الأعمال الفنية؟
طبعا الانترنت ساهم بنقلة كبيرة في الوسط الفني، لانو سمح لينا باننا نشوف كل انواع الفن من كل بقاع العالم، وبقا الفنان بيقدر ينشر اعماله بكل سهولة ويقدؤ ينال ال exposure المناسب سواء عشان يبيع او يتعرف على زملاؤ من الوسط الفني عشان يتعرف او عشان يلقا فرص عمل
خصوصي لينا نحن الفنانين في بداية مشوارنا وما أقمنا معارض.
وللعرضو قبل كدة انو المعارض تلقا فرضة أكبر تتعاقد مع مواهب كتيرة وجديدة
ما هي أفضل نصيحة تلقيتها؟
أحسن نصيحة التقيتها كان من استاذ عفيقي وهي ” ما تخافي، الفنان ما بخاف جازفي بالعندك وخليك مقدامة”
ما هو تعريفك للسعادة؟
هي أنك تحس بالامان والراحة وأنك تلقا نفسك في المكلن البتحبو ووسط الناس البتحبهم وبحبوك
ما هي أسعد ذكرياتك؟
احلي زكريات حياتي عشتها ف القيادة، لانها اكتر مكان انا كنت لاقية فيها نفسي وكنت روحي واطلقت العنان لشغفي ولاقيت فيها فنانين وناس بيقدرو يفهموني ويفهمو افكاري كنا كلنا جوانا نفس الحب نفس الشغف ونفس روح الثورة
Make it or break it moment
ما هي بعض اللحظات الحاسمة في رحلتك الفنية؟
ممكن اقول انها هسي لاني قدام قرار أنى اقيم اول معرض لي في الخرطوم وحاعملو باذن الله
ما هو أكثر إنجاز تفتخر به؟
اكتر انجاز فخورة بيو أنى بقيت الفنانة الانا عليها اليوم رغم كل العراقيل ورغم اعتراض الاهل أني نجحت براي واني دعمت نفسي بنفسي ونلت
ما هي بعض الدروس التي لا تنسى التي تعلمتها في الحياة؟
درس علمتني ليو الحياة، انو ما استسلم رغم التحديات البتحصل وما اقيف من شغلي البحبو
ماذا تفعل في وقت فراغك؟
في اوقات فراغي؟ بطلع مع اصدقائي بحضر افلام ومسلسلات
ما الذي تجديه أكثر فائدة في كونك فنانًا؟
اكتر حاجة مكافئة في كوني فنانة انو الفن بالنسبة لي هو شغفي وملاذي وموهبتي وهو برضو شغلي والحاجة البستررزق بيها واني محظوظة قدرت القا اجمع بين البحبو وبين مهنتي
من هي الشخصية الأنثوية الأكثر تأثيراً في حياتك ولماذا؟
كل النساء الصنعو نفسهم بنفسهم فنانات او غير فنانات، صديقاتي الحولي هم قدوتي ومصدر الهامي والسبورت سيستم بتاعي

كيف يصفك أصدقاؤك المقربون؟
صحباتي بدلعوني موبي
بوصوفني باني strong independent woman and kind
ماذا تعني لكي النسوية؟
النسوية هي المحور الداير حولو شغلي كله. اي لوحى رسمتها كانت بشكل او باخر بتتبني قضية او مبدأ نسوي، النسوية بتعني لي حقوقي وحقوق النساء وحقوق المستضعفات والمعنفات والاقليات. بتعني لي العدالة الاجتماعية والتضامن.

Leave a Reply